វិសាខបូជាគឺជាថ្ងៃប្រកបដោយនក្ខត្តឫក្សដ៏ឧត្តម ជាថ្ងៃដ៏មានមង្គលក្នុងប្រតិទិនរបស់ ព្រះពុទ្ធសាសនា។ថ្ងៃនេះគឺជាថ្ងៃដែលពុទ្ធសាសនិកជន ទាំង ព្រះសង្ឃ ទាំងគ្រហស្ថ បានប្រជុំគ្នា ក្នុងទីបូជនីយដ្ឋាននានា ទូទាំងពិភពលោក មានវត្តអារាមជាដើម ដើម្បីធ្វើការនមស្សការ រំលឹកដល់ថ្ងៃវិសាខបូជានេះ។
បុណ្យវិសាខបូជា សំដៅចំពោះនក្ខត្តសម័យ៣វេលាគឺ
- វេលាកាលព្រះសម្មាសម្ពុទ្ធទ្រង់ប្រសូត (ថ្ងៃសុក្រពេញបូរមី ខែពិសាខ ឆ្នាំច)
- វេលាកាលដែលព្រះសម្មាសម្ពុទ្ធទ្រង់ត្រាស់ដឹង (ថ្ងៃពុធពេញបូរមី ខែពិសាខ ឆ្នាំរកា)
- វេលាកាលដែលព្រះសម្មាសម្ពុទ្ធទ្រង់ចូលបរិនិព្វាន (ថ្ងៃអង្គារពេញបូរមី ខែពិសាខ ឆ្នាំម្សាញ់)។
នៅថ្ងៃវិសាខបូជានេះពុទ្ធសាសនិកតែងតែរៀបចំតុបតែងគ្រឿងសក្ការៈទាំងឡាយមាន ទៀន ធូប ផ្កាភ្ងី និងគ្រឿងក្រអូបផ្សេងៗ ដើម្បីបូជាដល់ព្រះរតនៈទាំងបី គឺពុទ្ធរតនៈ មួយ ព្រះធម្មរតៈមួយ និងព្រះសង្ឃរតនៈមួយ ដើម្បីទទួលបាននូវសិរីមង្គលពោលគឺ សេចក្តីសុខដល់ខ្លួនផងនិងដល់ពួកជាញាតិផង។ ដោយឡែកនៅតាមវត្តអារាមតែងមានពិធី ជួបជុំគ្នា ដោយមានការដើរទក្សិណព្រះវិហារ និងរៀបចំរំដាប់ គ្រឿងសក្ការៈ នមស្សកា ព្រះរតនត្រៃ ចំរើនព្រះបរិត្ត និមន្តព្រះសង្ឃសំដែងព្រះធម៌ ទេសនា និងមានសូត្ររំលឹក អំពីពុទ្ធប្បវត្តិ និងគុណវិសេសរបស់ព្រះអង្គតាម សទ្ធាជ្រះថ្លា។
សូមរំលឹកដែរថា បុណ្យវិសាខបូជាត្រូវបានទទួលអនុម័តជាថ្ងៃវិសាខអន្តរជាតិ (The United Nations Day of Vesak) របស់អង្គការសហប្រជាជាតិនៅថ្ងៃទី ១៥ ខែធ្នូ ឆ្នាំ១៩៩៩ ដោយកំណត់យកថ្ងៃពេញបូរមីក្នុងខែឧសភារៀងរាល់ឆ្នាំដើម្បីប្រារព្ធ បុណ្យវិសាខបូជា ជាលក្ខណៈអន្តរជាតិនិងរៀបចំដោយអង្គការសហប្រជាជាតិផ្ទាល់ នៅតាមទីកន្លែងនានារបស់អង្គការសហប្រជាជាតិ មានទីស្នាក់ការកណ្តាល របស់អង្គការ សហប្រជាជាតិ(The United Nations Headquarters) ជាដើម។
វិសាខបូជាអន្តរជាតិដំបូងគឺ ប្រារព្ធនៅឆ្នាំ២០០០ នៅទីស្នាក់ការកណ្តាលរបស់អង្គការសហប្រជាជាតិដែលមាន ទីតាំងនៅទីក្រុងញូវយ៉ក (New York) ហើយបន្តបន្ទាប់មកប្រារព្ធធ្វើនៅប្រទេសថៃ តាំងពីឆ្នាំ២០០៤រហូតមក ចន្លោះតែឆ្នាំ២០០៨ វិសាខបូជាអន្តរជាតិគឺប្រារព្ធឡើង នៅប្រទេសវៀតណាម។
Popularity: 75% [?]
